Venkatesha Stotram - BrahmAnda PurAna

venkaṭeśo vāsudevaḥ pradyumno'mitavikramaḥ
saṅkarṣaṇo'niruddhaśrca śeṣādripatireva ca ||1||
janārdanaḥ padmanābho veṅkaṭācalavāsanaḥ
sṛṣṭikartā jagannātho mādhavo bhaktavatsalaḥ ||2||
govindo gopatiḥ kṛṣṇaḥ keśavo garuḍadhvajaḥ
varāho vāmanaśrcaiva nārāyaṇa adhokṣajaḥ ||3||
śrīdharaḥ puṃḍarīkākṣaḥ sarvadevastuto hariḥ
śrīnṛsiṃho mahāsiṃhaḥ sūtrākāraḥ purātanaḥ ||4||
ramānātho mahībhartā bhūdharaḥ puruṣottamaḥ
col̤aputrapriyaḥ śāṃto brahmādīnāṃ varapradaḥ ||5||
śrīnidhiḥ sarvabhūtānāṃ bhayakṛtbhayanāśanaḥ
śrīrāmo rāmabhadraśrca bhavabandhaikamocakaḥ ||6||
bhūtāvāso girāvāsaḥ śrīnivāsaḥ śriyaḥpatiḥ
acyutānantagovindo viṣṇurveṅkaṭanāyakaḥ ||7||
sarvadevaikaśaraṇaṃ sarvadevaikadaivatam
samastadevakavacaṃ sarvadevaśikhāmaṇiḥ ||8||
itīdaṃ kīrtitaṃ yasya viṣṇoramitatejasaḥ
trikāle yaḥ paṭhennityaṃ pāpaṃ tasya na vidyate ||9||
rājadvāre paṭhet ghore saṃgrāme ripusaṅkaṭe
bhūtasarpapiśācādibhayaṃ nāsti kadācana ||10||
aputro labhate putrān nirdhano dhanavān bhavet
rogārto mucyate rogāt baddho mucyeta baṃdhanāt ||11||
yadyadiṣṭatamaṃ loke tattatprāpnotyasaṃśayaḥ
aiśrvaryaṃ rājasammānaṃ bhaktimuktiphalapradam ||12||
viṣṇorlokaikasopānaṃ sarvaduḥkhaikanāśanam
sarvaiśvaryapradaṃ nṝṇāṃ sarvamaṅgalakārakam ||13||
māyāvī paramānandaṃ tyaktvā vaikuṇṭhamuttamam
svāmipuṣkariṇītīre ramayā saha modate ||14||
kalyāṇādbhutagātrāya kāmitārthapradāyine
śrīmadveṃkaṭanāthāya śrīnivāsāya te namaḥ ||15||
veṅkaṭādrisamaṃ sthānaṃ brahmāṇḍe nāsti kiñcana
veṅkaṭeśasamo devo na bhūto na bhaviṣyati ||16||
etena satyavākyena sarvārthān sādhayāmyaham
|| iti śrībrahmāṇḍapurāṇe brahmanāradasaṃvāde
śrī veṃkaṭagirī māhatmye śrī veṅkaṭeśastotraṃ saṃpūrṇaṃ ||